Af Hans Peder Kirkegaard

Uani allatami nassuiassuara iperangaassuseq qanoq paasisassaanersoq. Ilami oqaaseq taanna Aqago-mi nutaaliarisimavarput, tassunga tunngasumik kalaallisut oqaaseqanngimmat.

Ilisimaqqissaarniarnermi kiffaanngissutsip eqqarnerani pineqartartu ilagivaat ”iperangaassussuseq”. Inuk kiffaanngissuseqassaguni pisariaqarpoq inuup aamma iperangaassuseqarnissaa. Ilisimaqqissaarniarneriup iluani kiffaanngissutsimik angusaqartarneq assiggiinngitsunik tunngaveqarpoq. Iperangaasutsip inuit ataasiakkaat kiffaanngisutsimik angusaqartarnerannut tunngavoq. Imaalluni, inuit ataasiakkaarlutik tamarmik kiffaanngissuseqanngikkunik, inuiaat ataatsimut tamarmik kiffaanngissuseqarsinnaanngillat.

Ilisimaqqissaarniarnermi kiffaanngissutsit assigiinngitsut eqqartorneranni oqaaseq ”kiffaanngissuseq” amingarpoq. Kiffaanngissuseq paasivissagaanni, oqaatsitut sorlarisaa qiviarneqartariaqarpoq: Kiffaq. Kiffaq isumaqarpoq naalangaqarneq, taamaalluni kiffaanngisuseq isuqarluni naalagaqannginneq. Oqaatsini allani kiffaanngissusermik eqqartuinermi oqaatsip sorlaa allaasarpoq.

Assersuutigalugu tuluttut ”Freedom”, sorlarivaa ”Free”, imaalluni naalangaqannginneq eqqarsaatinginangu ’kiffaanngissuseq’ oqaaseq paasineqarsinnaalluni. Oqaaseq ”Freedom” imminut tunngavigivoq. Assersuutigalugu, kalaallisut oqaaseq ”panertoq” imminut tunngavigisoq. Panertoq panerpor, imaanngilaq masanngittoq, naak oqaaseq taanna aamma eqqortuusoq, kisianni ”Panertoq” imminut tunngaviuvoq.

Iperangaassuseq

Aallarniutitut eqqartorniarpara iperangaassutsip akerlia: Pituttungaaneq. Inuk silamikkut tarnimikkullu pituttungaasarpoq, ilaanni avataaninngaanniik ataavartumik nikanarsarneqarnikkut, imaluunniit imminut pituttorsinnaavoq kamammut, usorunneq sinnganerlu aqqutingalugit. Inuk allaniit imminulluunniit pituttugaasimagaluarini, kisimi namminneerluni iperangaasinnaavoq.

Inuk iperangaassuseqartoq qanorluunniit pituttorneqarsinnaanngilaq. Imminut ataqqigami, allanit ataqqineqannginnera soqutaanngilaq. Avataaniik inuit allat inuup ilumini iperangaassusaa saassussinnaanngilaat. Paarnaarussaangaluaruniluunniit kiffanngorunnanngilaq iperangaassuseqarami.

Peroriartornermi inuk nalusaminik ilaanni pituttungaasarpoq, inersumasunngornerminilu suli pituttugaasutut inuulluni. Imaassinnaavoq angajoqqaat ajukkussutai kingornukkai, inuit allat isiginnittariaasiat atigaa, nalullugu inuit allat kinaassusermut isummersornerat nalilersuinerallu akueriinnarsimallugit.

Nalikissuserlu taanna inersimasunngornermi anniatinngorluni, kingornalu taanna anniaat kamanningorluni. Taamaasilluni nalikissutsimut pituttugaanerup kingunerilerlugu kammanermut pituttugaaneq. Iperangaassuseq imaanngilaq inuit allat inuttut kinaassusernik nalilersuinerannik isummersornerannillu naqqiiniarsarineq. Naqqiiniarsarineq tassaalersimassooq inuup nammineq ilorminit kiffaanngissuseq pilersinnagu, kisiannili inunnit allanit kiffaanngissusermik tunitinniarsarineq.

Iperangaassuseq imminut tunngavingivoq, imaalluni inuup nammineq suna eqqortuunersoq nammineerluni ilisimanguniuk allat isumaasa pituttorsinnaanngilaa. Taanna imminut oqarfigineruvoq ”Iperangaassuseqarpunga”, avammallu oqaatiginnissaa pisariaqarani. Inuk nikanarsaasimasoq isumakkeerfigineqarluni, taassuma iliuuserisimasaanut iliuuserisaanullu pituttungaajunnaarluni. Kamak anniarnerlu, naak avataaniit tunniunneqaraluartut, inuup nammineq tigummivai, kiffaanngisuserlu angussaguniuk inuup kammanneq anniarnerlu nammineq iperartariaqarlugit.

Iperangaassuseqarneq pisinnaatitsilersarpoq inuk nammineq imminut nalagaaffigisinnaalerneranik. Inuit ataasiakkaarlutik tamarmik imminut aqupput, taamaasillutillu nammineerlutik aalangersinnaalerlugu inuiaqatigiinni qanoq inissisimassanerlutik. Inuiaqatigiittullu isumaqatigiinnermi assigiimmik anguniangaqalersinnaassapput inuiaqatigiittut kiffaanngissuseqalernissamik. Iperangaassuseqarnerup aamma pisinnaatilertarpaatigut kinaassusitta namminiussusittalu tigummiinnarnissaanut, qanorluunniit inuit oqaatsigiut arlaatigulluunniit saassukkaluarpatigut.

Inuit allat eqqarsartariaasernut misigissusernullu oqartussaaffeeruttarput. Tarnikkut silaqassusikkullu iperangaassuseqaravit, timikkut qanorluunniit pituttorneqartigigaluaruit kiffanngorsinnaanngilatit. 

1 Comment